2 : മോചനത്തിന്റെ രീതി ഇതാണ്: ആരെങ്കിലും അയല്ക്കാരനു കടം കൊടുത്തിട്ടുണ്ടെങ്കില്, അത് ഇളവുചെയ്യണം. അയല്ക്കാരനില് നിന്നോ സഹോദരനില്നിന്നോ അത് ഈടാക്കരുത്. എന്തെന്നാല്, കര്ത്താവിന്റെ മോചനം പ്രഖ്യാപിക്കപ്പെട്ടിരിക്കുന്നു.
3 : വിദേശീയരില് നിന്ന് കടം ഈടാക്കിക്കൊള്ളുക. എന്നാല്, നിന്റേത് എന്തെങ്കിലും നിന്റെ സഹോദരന്റെ കൈവശമുണ്ടെങ്കില് അത് ഇളവുചെയ്യണം.
5 : എന്തെന്നാല്, നിങ്ങളുടെ ദൈവമായ കര്ത്താവു നിങ്ങള്ക്ക് അവകാശമായിത്തരുന്ന ദേശത്ത് നിങ്ങള് അവിടുത്തെ വാക്കു കേള്ക്കുകയും ഞാന് ഇന്നു നല്കുന്ന അവിടുത്തെ കല്പനകളെല്ലാം ശ്രദ്ധാപൂര്വം പാലിക്കുകയും ചെയ്താല്, അവിടുന്ന് നിങ്ങളെ സമൃദ്ധമായി അനുഗ്രഹിക്കും.
6 : നിങ്ങളുടെ ദൈവമായ കര്ത്താവു തന്റെ വാഗ്ദാനമനുസരിച്ചു നിങ്ങളെ അനുഗ്രഹിക്കും. നിങ്ങള് അനേകം ജനതകള്ക്കു കടം കൊടുക്കും. നിങ്ങള് ഒന്നും കടം വാങ്ങുകയില്ല. നിങ്ങള് അനേകം ജനതകളെ ഭരിക്കും; നിങ്ങളെ ആരും ഭരിക്കുകയില്ല.
7 : നിങ്ങളുടെ ദൈവമായ കര്ത്താവ് നിങ്ങള്ക്കു നല്കുന്ന ദേശത്തെ പട്ടണങ്ങളില് ഏതിലെങ്കിലും ഒരു സഹോദരന് ദരിദ്രനായിട്ടുണ്ടെങ്കില്, നീ നിന്റെ ഹൃദയം കഠിനമാക്കുകയോ അവനു സഹായം നിരസിക്കുകയോ അരുത്.
9 : മോചനത്തിന്റെ വര്ഷമായ ഏഴാംവര്ഷം അടുത്തിരിക്കുന്നുവെന്നു നിന്റെ ദുഷ്ടഹൃദയത്തില് ചിന്തിച്ചു ദരിദ്രനായ സഹോദരനെ നിഷ്കരുണം വീക്ഷിക്കുകയും അവന് ഒന്നും കൊടുക്കാതിരിക്കുകയും അരുത്. അവന് നിനക്കെതിരായി കര്ത്താവിന്റെ സന്നിധിയില് നിലവിളിക്കുകയും അങ്ങനെ അതു നിനക്കു പാപമായിത്തീരുകയും ചെയ്യാതിരിക്കാന് സൂക്ഷിച്ചുകൊള്ളുക.
10 : നീ അവന് ഉദാരമായി കടംകൊടുക്കണം. അതില് ഖേദിക്കരുത്. നിന്റെ ദൈവമായ കര്ത്താവു നീ ചെയ്യുന്ന എല്ലാ ജോലികളിലും നീ ആരംഭിക്കുന്ന എല്ലാ പ്രവൃത്തികളിലും നിന്നെ അനുഗ്രഹിക്കും.
11 : ഭൂമിയില് ദരിദ്രര് എന്നും ഉണ്ടായിരിക്കും. ആകയാല്, നിന്റെ നാട്ടില് വസിക്കുന്ന അഗതിയും ദരിദ്രനുമായ നിന്റെ സഹോദരനു വേണ്ടി കൈയയച്ചു കൊടുക്കുക എന്നു ഞാന് നിന്നോടു കല്പിക്കുന്നു.
അടിമകള്ക്കു മോചനം
12 : നിന്റെ ഹെബ്രായ സഹോദരനോ സഹോദരിയോ നിനക്കു വില്ക്കപ്പെടുകയും നിന്നെ ആറു വര്ഷം സേവിക്കുകയും ചെയ്താല്, ഏഴാം വര്ഷം ആ ആള്ക്ക് സ്വാതന്ത്ര്യം നല്കണം.
13 : സ്വാതന്ത്ര്യം നല്കി അയയ്ക്കുമ്പോള് വെറും കൈയോടെ വിടരുത്.
14 : നിന്റെ ആട്ടിന്പറ്റത്തില് നിന്നും മെതിക്കളത്തില് നിന്നും മുന്തിരിച്ചക്കില് നിന്നും അവന് ഉദാരമായി നല്കണം. നിന്റെ ദൈവമായ കര്ത്താവു നിനക്കു നല്കിയ ദാനങ്ങള്ക്കനുസരിച്ച് നീ അവനു കൊടുക്കണം.
15 : നീ ഒരിക്കല് ഈജിപ്തില് അടിമയായിരുന്നെന്നും നിന്റെ ദൈവമായ കര്ത്താവാണു നിന്നെ രക്ഷിച്ചതെന്നും ഓര്ക്കണം. അതിനാലാണ് ഇന്നു ഞാന് നിന്നോട് ഇക്കാര്യം കല്പിക്കുന്നത്.
16 : എന്നാല്, അവന് നിന്നെയും നിന്റെ കുടുംബത്തെയും സ്നേഹിക്കുകയും നിന്നോടുകൂടെ താമസിക്കാന് ഇഷ്ടപ്പെടുകയും ചെയ്യുന്നതുകൊണ്ട്, ഞാന് നിന്നെ പിരിഞ്ഞുപോവുകയില്ല എന്നു പറഞ്ഞാല്,
17 : അവനെ ഭവനവാതില്ക്കല് കൊണ്ടുവന്ന് ഒരു തോല്സൂചികൊണ്ട് നീ അവന്റെ കാതു തുളയ്ക്കണം; അവന് എന്നും നിന്റെ ദാസനായിരിക്കും. നിന്റെ ദാസിയോടും അപ്രകാരം ചെയ്യുക.
18 : അവനെ സ്വതന്ത്രനാക്കുമ്പോള് നിനക്കു ഖേദം തോന്നരുത്. ഒരു കൂലിക്കാരന് കൊടുക്കേണ്ടതിന്റെ പകുതിച്ചെലവിന് അവന് ആറു വര്ഷം നിനക്കുവേണ്ടി ജോലി ചെയ്തു. നിന്റെ ദൈവമായ കര്ത്താവു നിന്റെ എല്ലാ പ്രവൃത്തികളിലും നിന്നെ അനുഗ്രഹിക്കും.
കടിഞ്ഞൂലുകള്
19 : നിന്റെ ആടുമാടുകളില് ആണ്കടിഞ്ഞൂലുകളെയെല്ലാം നിന്റെ ദൈവമായ കര്ത്താവിനു സമര്പ്പിക്കണം. കടിഞ്ഞൂല്ക്കാളയെക്കൊണ്ടു പണി എടുപ്പിക്കരുത്; കടിഞ്ഞൂലാടിന്റെ രോമം കത്രിക്കുകയും അരുത്.
20 : നിന്റെ ദൈവമായ കര്ത്താവു തിരഞ്ഞെടുക്കുന്ന സ്ഥലത്തുവച്ച് അവിടുത്തെ സന്നിധിയില് വര്ഷം തോറും നീയും നിന്റെ കുടുംബവും അവയെ ഭക്ഷിക്കണം.
21 : അവയ്ക്ക് മുടന്തോ അന്ധതയോ മറ്റെന്തെങ്കിലും ന്യൂനതയോ ഉണ്ടെങ്കില് നിന്റെ ദൈവമായ കര്ത്താവിന് അവയെ ബലികഴിക്കരുത്.
22 : നിന്റെ പട്ടണത്തില് വച്ചുതന്നെ അതിനെ ഭക്ഷിച്ചുകൊള്ളുക. ഒരു കലമാനിനെയോ പുള്ളിമാനിനെയോ എന്നതുപോലെ, ശുദ്ധനും അശുദ്ധനും ഒന്നുപോലെ, അതു ഭക്ഷിക്കാം.
23 : എന്നാല്, രക്തം ഭക്ഷിക്കരുത്. അതു ജലം പോലെ നിലത്തൊഴിച്ചു കളയണം.
അദ്ധ്യായം 16
പെസഹാത്തിരുനാള്
1 : അബീബുമാസം ആചരിക്കുകയും നിന്റെ ദൈവമായ കര്ത്താവിന്റെ പെസഹാ ആഘോഷിക്കുകയും ചെയ്യുക; അബീബു മാസത്തിലാണ് നിന്റെ ദൈവമായ കര്ത്താവു രാത്രിയില് നിന്നെ ഈജിപ്തില്നിന്നു പുറത്തേക്കു നയിച്ചത്.
2 : നിന്റെ ദൈവമായ കര്ത്താവ് തന്റെ നാമം സ്ഥാപിക്കാന്വേണ്ടി തിരഞ്ഞെടുക്കുന്ന സ്ഥലത്ത് ആടുമാടുകളില്നിന്ന് അവിടുത്തേക്ക് പെസഹാബലി അര്പ്പിക്കണം.
3 : അവയോടുകൂടെ പുളിപ്പുള്ള അപ്പം ഭക്ഷിക്കരുത്. ഏഴു ദിവസം യാതനയുടെ അപ്പമായ പുളിപ്പില്ലാത്ത അപ്പം നീ ഭക്ഷിക്കണം. നീ ഈജിപ്തില്നിന്നു പുറത്തുകടന്ന ദിവസത്തെപ്പറ്റി ജീവിതകാലം മുഴുവന് ഓര്മിക്കുന്നതിനു വേണ്ടിയാണിത്. തിടുക്കത്തിലാണല്ലോ ഈജിപ്തില് നിന്നു നീ പുറപ്പെട്ടത്.
4 : ഏഴു ദിവസത്തേക്കു നിന്റെ അതിര്ത്തിക്കുള്ളില് പുളിമാവ് കാണരുത്. പ്രഥമദിവസം സായാഹ്നത്തില് അര്പ്പിക്കുന്ന ബലിയുടെ മാംസത്തില് അല്പം പോലും പ്രഭാതം വരെ അവശേഷിക്കുകയുമരുത്.
5 : നിന്റെ ദൈവമായ കര്ത്താവു നിനക്കു തരുന്ന പട്ടണങ്ങളില് ഏതിലെങ്കിലും വച്ച് പെസഹാബലി അര്പ്പിച്ചാല്പ്പോരാ;
6 : നിന്റെ ദൈവമായ കര്ത്താവു തന്റെ നാമം സ്ഥാപിക്കുന്നതിനുവേണ്ടി തിരഞ്ഞെടുത്ത സ്ഥലത്തുവച്ച്, സൂര്യാസ്തമയസമയത്ത്, അതായത്, നിങ്ങള് ഈജിപ്തില്നിന്ന് പുറപ്പെട്ട സമയത്ത്, പെസഹാബലി അര്പ്പിക്കണം.
7 : നിന്റെ ദൈവമായ കര്ത്താവു തിരഞ്ഞെടുക്കുന്ന സ്ഥലത്തുവച്ച് അതു വേവിച്ചു ഭക്ഷിച്ചതിനു ശേഷം രാവിലെ എഴുന്നേറ്റു കൂടാരത്തിലേക്കു മടങ്ങണം.
8 : ആറുദിവസം പുളിപ്പില്ലാത്ത അപ്പം ഭക്ഷിക്കണം. ഏഴാം ദിവസം നിന്റെ ദൈവമായ കര്ത്താവിനു വേണ്ടി നിങ്ങള് ആഘോഷപൂര്വം ഒരുമിച്ചു കൂടണം.
9 : അന്നു ജോലിയൊന്നും ചെയ്യരുത്.
ആഴ്ചകളുടെ തിരുനാള്
10 : ഏഴാഴ്ചകള് എണ്ണുക. കൊയ്ത്തു തുടങ്ങിയ ദിവസം മുതലാണ് ആഴ്ചകള് എണ്ണേണ്ടത്. അനന്തരം, നിന്റെ ദൈവമായ കര്ത്താവു നിനക്കു നല്കുന്ന അനുഗ്രഹങ്ങള്ക്കൊത്ത വിധം സ്വാഭീഷ്ടക്കാഴ്ചകള് സമര്പ്പിച്ചുകൊണ്ട് അവിടുത്തേക്കു ആഴ്ചകളുടെ തിരുനാള് കൊണ്ടാടുക.
11 : നിന്റെ ദൈവമായ കര്ത്താവ് തന്റെ നാമം സ്ഥാപിക്കുന്നതിനു വേണ്ടി തിരഞ്ഞെടുക്കുന്ന സ്ഥലത്തുവച്ചു നീയും നിന്റെ മകനും മകളും ദാസനും ദാസിയും നിന്റെ പട്ടണത്തിലുള്ള ലേവ്യനും നിന്റെ ഇടയിലുള്ള പരദേശിയും അനാഥനും വിധവയും അവിടുത്തെ മുന്പില് സന്തോഷിക്കണം.
12 : ഈജിപ്തില് നീ അടിമയായിരുന്നെന്ന് ഓര്മിക്കുക; ഈ കല്പനകളെല്ലാം ശ്രദ്ധാപൂര്വം അനുസരിക്കണം.
14 : ഈ തിരുനാളില് നീയും നിന്റെ മകനും മകളും ദാസനും ദാസിയും നിന്റെ പട്ടണത്തിലുള്ള ലേവ്യനും പരദേശിയും അനാഥനും വിധവയും സന്തോഷിക്കണം.
15 : നിന്റെ ദൈവമായ കര്ത്താവ് തിരഞ്ഞെടുക്കുന്ന സ്ഥലത്ത് അവിടുത്തേക്ക് ഏഴുദിവസം തിരുനാള് ആഘോഷിക്കണം. നിന്റെ എല്ലാ വിളവുകളും പ്രയത്നങ്ങളും നിന്റെ ദൈവമായ കര്ത്താവ് അനുഗ്രഹിക്കും; നീ സന്തോഷപൂരിതനാവുകയും ചെയ്യും.
16 : ആണ്ടില് മൂന്നു പ്രാവശ്യം, പുളിപ്പില്ലാത്ത അപ്പത്തിന്റെ തിരുനാളിലും ആഴ്ചകളുടെ തിരുനാളിലും കൂടാരത്തിരുനാളിലും നിന്റെ ദൈവമായ കര്ത്താവ് തിരഞ്ഞെടുക്കുന്ന സ്ഥലത്ത് പുരുഷന്മാരെല്ലാവരും സമ്മേളിക്കണം. അവര് കര്ത്താവിന്റെ മുന്പില് വെറും കൈയോടെ വരരുത്.
17 : നിന്റെ ദൈവമായ കര്ത്താവു നിങ്ങള്ക്കു നല്കിയിരിക്കുന്ന അനുഗ്രഹങ്ങള്ക്കൊത്ത വിധം ഓരോരുത്തരും കഴിവനുസരിച്ചു കാഴ്ചകള് സമര്പ്പിക്കണം.
നീതിപാലനം
18 : നിന്റെ ദൈവമായ കര്ത്താവു നല്കുന്ന പട്ടണങ്ങളില് ഗോത്രം തോറും ന്യായാധിപന് മാരെയും സ്ഥാനികളെയും നിയമിക്കണം. അവര് ജനങ്ങള്ക്ക് നിഷ്പക്ഷമായി നീതി നടത്തിക്കൊടുക്കട്ടെ.
19 : നിന്റെ വിധികള് നീതിവിരുദ്ധമായിരിക്കരുത്. നീ പക്ഷപാതം കാട്ടുകയോ കൈക്കൂലി വാങ്ങുകയോ അരുത്. എന്തെന്നാല്, കൈക്കൂലി ജ്ഞാനിയെ അന്ധനാക്കുകയും നീതി നിഷേധിക്കാന് പ്രേരിപ്പിക്കുകയും ചെയ്യുന്നു.
20 : നീ ജീവിച്ചിരിക്കുന്നതിനും നിന്റെ ദൈവമായ കര്ത്താവു തരുന്ന രാജ്യം കൈവശമാക്കുന്നതിനും വേണ്ടി നീതിമാത്രം പ്രവര്ത്തിക്കുക.
21 : നിന്റെ ദൈവമായ കര്ത്താവിനു നീ ഉണ്ടാക്കുന്ന ബലിപീഠത്തിനരികേ അഷേരാദേവതയുടെ പ്രതീകമായി ഒരു വൃക്ഷവും നട്ടു പിടിപ്പിക്കരുത്.
22 : നിന്റെ ദൈവമായ കര്ത്താവ് വെറുക്കുന്ന സ്തംഭവും നീ സ്ഥാപിക്കരുത്.
